وعلى طول وبسرعة عدت السنة…ومحسناش بيها..وقبلها عدت برضه السنة الهجرية…
حاجات كتير حصلت فيها..ساعات كانت جميلة…وساعات كانت حزينة…بس في كل الاحوال….احنا كبرنا سنة ، وخبرتنا في الحياة زادت سنة، وقربنا من احلامنا بإذن الله اكتر …ولو ملحقناش السنة الهجرية قبل ما تخلص…فلازم نستغل الوقت القليل جداً الي فاضل في السنة الميلادية..نستغل الطاقة الجميلة الي ملهاش حدود الي بتجلنا لما نبدأ سنة جديدة..او ممكن تقول حياة جديدة….
حاجات كتير لازم نعملها قبل ما نودع السنة دي ونستقبل سنة جديدة وان شاء الله سعيدة…من احلى واسعد اللحظات طول السنة ..هي اللحظات الاخيرة الي فيها…واحنا بنودعها….بيمر علينا شريط ذكرياتنا كله في السنة دي …وعشان فعلاً تكون من اسعد لحظات حياتنا..وعشان فعلاً نودع السنة دي واحنا مبسوطين..مرتاحين…وراضيين….وكلنا امل في السنة الجديدة…في حاجات لازم نعملها في اللحظات القليلة الي فاضلة فيها….حاجات بسيطة …لكن متتخيلش حجم السعادة الي هتحصل عليها بإذن الله لما تعملها…..
اول حاجة….ايه احلى من ان يكون معاك كشكول حياتك…يعني ايه ؟ كشكول محدش غيرك يقرب منه ….محدش غيرك يقرا فيه..كل ما تلاقي نفسك عايز تخرج الي جواك….ببساطة امسك قلمك وابدأ اكتب واحكي ومش هتحس بنفسك غير والابتسامة على وشك لما تحس بالراحة اول ما تخلص ..
لكن الاحلى لما تمسك الكشكول ده اخر يوم في السنة…وخلاص فاضل شوية والسنة دي تخلص…تعد مع نفسك وتسرح بخيالك وتسترجع كل الحاجات الحلوة الي حصلت لك من اول يوم في السنة دي لحد النهاردة…اكتب كل احلامك الي بفضل الله اتحققت….كل المواقف الي اثرت فيك….الي هزتك..الي غيرتك…مهما كانت الحاجات دي بسيطة… …اد ايه هتحس بالسعادة لما تفتكر كل ده….!
لكن ممكن وانت بتكتب تقابلك حاجات توقفك….ذكريات في السنة دي ممكن تكون مش جميلة..ممكن يكون فيها حزن..فيها ألم..بس عارف…قول الحمد لله وانت على وشك ابتسامة جميلة…كل ده كان في الماضي خلاص..كل ده اتعلمت منه…ولولا ده ممكن مكنتش انت هنا دلوقتي..! محدش عارف الخير فين ..ربنا قال (وعسى ان تكرهوا شيئاً وهو خير لكم ).
فبتعمل حاجة بسيطة اوي..بتكتب كل الحاجات دي…وتكتب اتعلمت منها ايه…متقولش متعلمتش..اكيد اتعلمت منها…طب لو اتعلمت حاجات هتكون ايه ؟ اكتبها بقى..عارف لو انت رجعت دلوقتي في نفس المواقف دي..هل تفكيرك هيكون هو نفس التفكير…اكيد لأ..عشان انت الحمد لله اتعلمت منها ويمكن ده كان الخير ليك وانت مش عارف…فمن الليلة دي كل ما هتفتكر الحاجات دي في المستقبل هتفتكر انت اتعلمت منها اد ايه …فساعتها تقدر تكمل سعيد عشان هتتفاداها في المستقبل وبسببها خبرتك في الحياة زادت وبقيت انسان احسن….
بعد ما تخلص كتابة كل الحاجات الحلوة الي مرت عليك السنة دي وكل الحاجات الي اتعلمتها …بعد كل الشعور الجميل الي هتحس بيه ده وانت بتكتب وتفضفض….لسه ده مش كل حاجة…
ندخل على السنة الجديدة بقى…ها..نفسك في ايه..؟ بتحلم بإيه السنة الجاية..؟ اكتب كل احلامك وكل اهدافك الي عايز تعملها في السنة الجديدة بإذن الله…..ليه تكتبها ؟؟ عشان زي الليلة الجميلة دي السنة الجاية بعد ما تحقق احلامك ان شاء الله مش هقدر اوصفلك السعادة الي هتكون عليها بإذن الله لما تقرا الي انت كتبته..وتشوف ان الي كان في يوم احلام…فعلاً بقى حقيقة…وفعلاً انت قدرت تحقق الاحلام دي…
دلوقتي وقت الجد بقى…فاضل انك تكتب قراراتك للسنة الجديدة…ايه الحاجات الي قررت تعملها؟؟ ايه الحجات الي قررت تبطلها؟؟ ايه الحاجات الي عايز تغيرها فيك السنة الجديدة ؟؟ بكل حماس اكتب كل القرارات دي ..و بكل الحماس قرر انك فعلا هتبدأ السنة الجديدة صفحة جديدة….وحياة جديدة..وهتكون انسان احسن..واسعد بكتير بإذن الله..وهتتحمل المسؤولية..وتتحمل اي حاجة في سبيل تحقيق احلامك الجميلة دي ان شاء الله …
وبعد ما تخلص كل ده…ابتسم واحمد ربنا على السنة الي فاتت بكل ما فيها…..وخلي اخر لحظات السنة القديمة واول لحظات السنة الجديدة وانت ساجد بين ايديه تدعيه وتستغفره وتشكر فضله عليك وبتدعيه يكرمك وتحقق احلامك السنة الجديدة ان شاء الله…وفعلاً احلى حضن في الوجود ان تحضن الارض وانت ساجد للودود..
دلوقتي انت هتقوم على طول اهو تعمل الحاجت الي اتفقنا عليها وهنلخصها مع بعض اهو…
1) هات كشكول (لو مفيش هات ورق طيب دلوقتي والحق اكتب فيه ).
2)اكتب واحكي عن كل الحاجات الحلوة الي انت مريت بيها السنة دي.
3)اكتب واحكي عن كل الحاجات الي مش حلوة الي اتعلمت منها واكتب استفدت منها ايه.
4)اكتب احلامك واهدافك الي نفسك تحققها السنةالجديدة.
5)اكتب قراراتك الي قررت تنفذها..الحاجات الي هتغيرها فيك..الي هتبطلها..الي هتلتزم بيها… .
6)ابتسم ابتسامة جميلة واحمد ربنا وقبل ما السنة دي تخلص روح وصلي ركعتين وخليك ساجد وخلي اول لحظات السنة الجديدة وانت ساجد لربنا بتشكره على فضله السنة دي وكل سنة وتستغفره من كل الي عملته فيها وتسأله من فضله السنة الجديدة
7)ابدأ السنة الجديدة وانت انسان جديد خالص ..مبتسم للحياة فاتح صفحة جديدة ومسامح ماضيك ومتعلم منه .
حتى لو السنة الجديدة بدأت فعلاً فمتخليش اول يوم فيها معدي غير وانت كاتب كل الحاجات دي
وافتكر دايماً
ان التغيير تدريجي يعني انت مش مطلوب منك اول يوم في السنة تكون متغير 100% ..خلي كل شهر وكل اسبوع وكل يوم حاجات بسيطة من القرارات الي قررتها تتنفذ…وعلى اخر السنة ان شاء الله هتلاقي نفسك حققت كل احلامك الي انت حلمت بيها ونفذت كل قراراتك دي..وبقت حقيقة جميلة انت عايشها….وخليك فاكر ان ( خير الاعمال ادومها وان قل ) .
واخيراً بعد ما تخلص كل الحاجات الجميلة دي…هتحس بطاقة وسعادة ملهاش حدود..احمد ربنا على السعادة دي…وابدأ السنة الجديدة بكل امل وتفاؤل …
اتمنى ليك كل السعادة في الدنيا والآخرة واني اشوفك يا رب دايماً كده فرحان وبتضحك واشوف دايماً ابتسامتك الجميلة دي..واشوفك وانت بتحقق اهدافك من يوم ليوم ومن سنة لسنة ان شاء الله ^ــــ^
مهند هشام
31/12/2010
30.042539
31.276939